Жижиг арал дээр орших Сингапур нь Дэлхийн II дайнаас өмнө Англи улсын колони байсан төдийгүй уг аралд байгалийн баялаг байтугай ундны ус ч байхгүй, мөн Сингапурын оршин суугчдын ихэнх нь хятад үндэстэн боловч малай, энэтхэг гэх мэт олон үндэстнээс бүрдэж байсан юм. Гэвч энэ хотын ирээдүй Ли Куан Ю хэмээх хүний ачаар хөгжлийн оргил өөд чиглэж чаджээ. “Сингапурын гайхамшиг”-ийн эцэг, тус орны анхны ерөнхий сайд асан Ли Куан Ю дурдатгал номондоо авлига болон хар тамхины мафитай хийсэн тэмцэл, ард иргэдээ нэгдэн нягтрахыг, улс орондоо эмх журам тогтоож, гар хумхилгүй ажиллаж, байгалийн баялаггүй Сингапур улсыг хэрхэн дэлхийн хамгийн баян орнуудын нэг болгосон тухайгаа тун дэлгэрэнгүй өгүүлжээ.